Gi ei utfordring!

På måndag hadde eg eit innlegg som viste korleis ein kan lage papirposar eller "gåveesker" til å gi vekk gåver i. Dei kan fyllast med det du skal gi bort anten det er heimelaga eller kjøpt. Eg lova eg skulle kome med eit tips på kva de kunne fylle dei med og her kjem tipsa :-)



I januar hadde me Restegarn som tema her på bloggen. Det er jo ei kjend sak at me som strikkar har mykje garn liggande (både opna og uopna nøster). Eit godt tips for å slanke garnlageret er rett og slett å gi det vekk! (Ikkje heile sulamitten, men delar av det). Dette er fint både til uerfarne strikkarar som treng ei utfordring og det er også fint til erfarne strikkarar. Kanskje kan det vere kjekt å få oppskrift og garn til babysokkar for ei nybakt mor?

Dersom mottakaren ikkje kan strikke kan du  leggje ved eit kort som seier at ein "kurskveld" er inkludert eller at du tilbyr "online" strikkehjelp. Du kan leggje ved ei oppskrift du har liggande eller skrive ut ei av dei mange gratisoppskriftene som ligg på nettet. (Mellom anna hjå Nøstebarn her.)

Her har eg laga eska av ein fargeprøvebrosjyre og oppi er det Silkeull og oppskrift 1926 Sjal. Har du strikkepinnar kan du leggje det med og viss ikkje har mottakaren kanskje sjølv?

Her ligg det restegarn i fine fargar som mottakaren kan strikke sjal av.

Dersom du har restegarn kan det vere greit å leggje ved oppskrifter på småplagg som luer, babysokkar, vottar eller skjerf. Til dømes Oppskrift 1904 eller 1912 frå Nøstebarn. (Foto: Tove Breistein)

Det er også supert å gi vekk garnet i ein heimesydd pose som kan brukast igjen til innpakning eller til strikketøypose? (Bilete er frå Brukt på nytt der det er skrildra korleis du syr posane)

Så minner eg om at eg trekkjer vinnaren av Singlet i ull/silke i morgon. Vinnaren vert trukke av alle kommentarane som er posta på innlegga denne veka. Så det er ikkje for seint å vere med i trekninga endå!