Stopping steg for steg med eit ekspresstips

Det er veldig greit å kunne stoppe. Me tenkjer gjerne på stopping når det gjeld sokkar og det er nok kanskje fordi stopping er greit her fordi: Det vert nesten usynleg, ikkje klumpete å gå på og fint å gjere på grovare/strikka plagg. Men me kan med hell stoppe andre plagg også. Kort sagt er stopping fint å bruke der ein del av plagget er slite vekk/store hol.
Er det vanskeleg? Det er ikkje så vanskeleg. Eg har lært bror min, Egil, å stoppe sokkar og han får det til. No meiner eg ikkje å kjønnsdiskrimenere, for eg har også onklar som stoppar sokkar. Poenget er at han ikkje har sydd så mange sting i sitt liv og i alle fall ikkje på 40 år..

Her kjem i alle fall stopping trinn for trinn:

1.Du treng:

• Stoppesopp (til å leggje inni plaggen medan du stoppar). Tresleiv eller øse eller anna kan også fungere.
• Stoppegarn: det er eit tynt ullgarn som er forsterka med nylon. Anna tunt garn fungerer også. Så likt plagget i tjukkleik å farge som mogeleg.
• Stoppenål: Ei nål med butt ende, men nål med spiss går og. Ikkje bruk for tjukk nål!
• Saks

2.Fest
Stikk stoppesoppen inni plagget.
Fest tråden ved å sy nokre tråklesting fram og tilbake og avslutt gjerne med eit "halvstikk": Stikk nåla ned rett ved der tråden kjem opp, tre nåla gjennom løkka, stram til.
Du kan også la tråden henge og feste han i stoppinga etterpå.

3. Sy rundt holet
Hol vert større når plagget er brukt ei stund etter at det gjekk hol. Me treng derfor å strame inn holet til opprinneleg fasong:
Sy rundt holet med små tråklesting. Er plagget tynnslite rundt holet syr du litt lenger vekk frå holet.
Stram til slik at holet vert mindre, men ikkje for mykje, for då vert det klumpete.
Fest med eit halvstikk.

4. Lag "renning"
Sy fram og tilbake over holet =horisontalt. Sy opp litt på kvar side for kvar gong.

5. Innslag
Sy fram og tilbake vertikalt, men vev med nåla slik at nåla går over og under renninga du laga opå forrige trinn. Sy fast i plagget på på kvar side.
På neste rad syr du over dei trådane du sydde under sist og omvendt. Dette lærte du heilt sikkert på barneskulen?

Fest tråden slik som du gjorde i starten.



Håpar dette var til å forstå?

Eg har sydd med garn i kontrastfarge for at det skulle vise godt på bilda. Det kan jo også vere ein dekorativ effekt, men her er same type sokk stoppa med garn i nesten same farge som sokken.
Disse sokkane kjem i skostr 17 til 46 !








Ekspresstips!
Frå Oslo-avdelingen har eg fått tips om "ekspress-stopping" av sokkar:
Sy på ein lapp med store kastesting. Gjort på 0,0 ! Det vert kanskje litt meir klumpete enn stopping, men om alternativet er å ikkje gjere noko, så..

Breblå lapp er sydd på med sting i alle retningar. Lilla lapp med store kastesting og den grå lappen i likare farge på lapp og garn.

Ja då seier eg berre STOPP!