Alltid beredt!

Dette innlegget har ingenting med strikking eller ull å gjere. Men eit forslag til løysing på korleis ein skal kome gjennom det store talet barneselskap alltid beredt, utan stress og der både vaksne og born er nøgde.

Ja det vert mange ein skal gi gåve og eg kjenner "trøkket" etter at begge ungane byrja å gå i barnebursdagar. Me bur eit stykke frå butikkar og ofte freistar det lite å rase rundt på jakt etter gåver før kvart selskap. Eg har derfor prøvd å ha liggande eit lite lager med diverse gåver til ulike aldrar og kjønn. Men det er ikkje så velukka for det vert alltid liggande att noko som liksom ikkje freistar å gi til den eller den.

 Det er jo greit med pengar, så kan jubilanten kjøpe seg akkurat det som står på ønskelista. Men det er ikkje alltid så spennande å gi. Ein konvolutt med pengar liksom. Mi løysing er derfor å lage kort der pengane er ein del av dekoren.

Av og til lagar eg korta og andre gonger er ungane med. Materiala er alt muleg me har i hus. Så tilpassar eg motivet etter kor mykje me skal gi vekk. Pengane festar me med putetape eller fototape og sparar du på silkepapir og gåvepapir som kjem i hus har du godt materiale. Tenkte eg ville vise nokre av korta me har gitt vekk i det siste, så kanskje det kan inspirere andre?

Denne karen har me hatt i mange utgåver. Håret er krølla silkepapir. Har brukt eit glas som mal for hovudet. Blomane er stansa ut i gåvepapir.

Her i huset er alt som er frå det maritime populært. Kvart auge er ein 5-kroning og båten er ein 50-lapp.

Her ein lastebil som har fått verdifulle dekk og ei last som jubilanten blir bedt om å laste av. Tar 5 minutt å lage.

I morgon kjem det fleire tips til pengekort.
Ps. lurt å setje seg ned ein dag og lage ein heil gjeng med kort. Då er ein alltid beredt. Same kva..